من فارس دئيلم

من اوشاق اولار کن دوشموشوک غربتین یوللارینا ، 1369 – اینجی ایل ، قارداشیمی تزه جه دوغموش ، کیچیک بیر ببک دیرقونداقدا، آغلاییشلاری ، آغلاییشلاری سانکی عوصیاندیر ظالیم غربتین اوجاغلارینا.

بابام بیزدن اونجه گئتمیشدیر تهرانا ، ایکی ایل سونرا بیزیده آلدی یانینا ، ” گوزوم آرخادا قالماسین ، اطرافیمدا اولسون اوشاقلار “دئمیشدی آناما.

” ایران خودرو ” دا ایشچی دی بابام ، اورگی، بیله گی قووتلی – دلی قانلی دی بابام . منیم کیمی سئویردی اودا خیاله دالماقی ،اوزومدن بویوک دور بلکه اومود لاریم.

آند ایچمیشدی و قرآنا یمین ائتمیشدی کی قیرمیزی بیر ماشین آلاجاغ بیزه،بابام اوچون بیر آرزو ، او و آنام ماشیندا اوتوروب ، اوشاقلاری آرخایا آتارکن آذربایجان لزگی سی قویوب و بیر آز سسینی آچیب ، سونرا ، ” هارا دادیر آنا یوردوم ”

آنام ، گوزل آنام ، قورخاردی ائشیگه چیخماغا ، ” دیل بیلمم و یول بیلمم” دییر کن گئجه گوندوز آغلاردی.

بابامین ایشدن دونوش لری بایرامیمیز اولوردو، او گلمه دن اونجه سفره میز قورولوردو ، قوخوسو هله ده بورنومدادیر ، بوغوسو گوزومده قاینییان شوربامیزین.

آه دردی آنام بیتمزدی ، سونرا دورور درین بیر اوف چکردی ، هر سفره ده گوزلری دولاردی و حسرتله قاباران اوره گی.

بیر گون هامیمیزا مژده وئردی بابام ، ” بوبایرام آذربایجان داییز” دئدی .

ایچیم ایچیمه سیغمادی ، صاباح قدر یاتا بیلمه دیم ، هانی به ماشین ،” قیرمیزی بیر ماشینلا گئده جه ییز  آذربایجانا ” دئمیشدیر بابام . ماشینسیز نه سیز نه سایاق آنا یوردوموزا دونه جه ییز دئدیم .

اماآنام اونجه ائو ایسته میش ، ” ماشین هر زامان آلماق اولار دئمیشدیر، آئو آلینمازمیش ، آخرته ایمان و دونیادا مکان” دئمیشدیر.

گوزل بابام هر زامان کی کیمی فداکاردیر، اومود لارینی یئمیش ، آنام ایلک دفعه اولار کن بیر شی ایسته میش ، سوزونو چئویرمه میشدیر بابام، یئره دوشورمه دی سوزونو ، آنام موتلو بابام اوموتلودو.آلاجاقدی ماشینی، آلاجاقدی .

طایفانین اوشاقلارینا شکلات آلدی ، بویوک آتاما گوزلوک ، نه نه مه  بیر گوللو چارقد ، اوره گیم شانلی اولاراق ، آنا یوردوما کوچمه گه  تله سیردی ، کیمسه اوردا منه تورک ، کوچمن ، یابانجی دئمییه جک، آذری موسیقی سینی دینله یه جه ییک دویاسینا .

بیر جمعه آخشامیندا یولا دوشدوک ، هر کسین بیر تعریف سیز هیجانی وار ایچینده ، دقیقه لر کئچمیر .

“وطنه یئتیشدیک ، بورا ماکو دور ” دئدی بابام، اتوبوس دان یئره یئنیب آتامین و نه نه مین قوجاغینا یورودوک ، اوشاقلار  بیزه “  فارس لارگلدی ” دئدیلر ، اوره گیم دولدو ، گوزلریم یاشلا بوشالدی ، تهراندا تورک و یابانجی ، آنا یوردومدا فارسدیلار ، دئدیلر .

بیز کیمیک ، من فارس دئیلم ، بو درد منی قوجالتمیر اولدورور .

اونجه تورپاغی اوپه جه یم ، و یمین اولون کی دوغولدوغوم تورپاغلاردا اوله جه گیم .