فيكرت صادق
قورخورسان...
دره‌دن دانيشيرام قورخورسان
"دره‌نين دوماني وار, سئلي وار"
داغدان دانيشيرام قورخورسان
" داغين اوچورومي وار , قاري وار"
دره بير يانا,
داغ بير يانا,
ياشايشداندا دانيشيرام قورخوسان
اؤزون بيل , قارداش!
آمما آغير درد دير قورخوب ياشاماق!
*عقيل آذردخت
ديل ...
ديل وارليق هويتدي بوني دويمالييق بيز
ناموسدي بلي, ناموسا جان وئر‌ملييق بيز
رنگين دئيشيب ديل ساتانين ارزشي اولماز
بنزر كسيلن بير خولا داي كؤك سالا بيلمز
هر كيمسه ديلين آتسا دينينده آتاجاقدير
ناموسسوز اولوب خوار اولاجاقدير , باتاجاقدير
ديل ناموسوم ائل غيرتيم اولكم شرفيمدير
هر تك تكينه وئرمگه جانيم هدفيمدير
ح.م.ساوالان
نييه منه پان دئدين؟
من ديليمدن دانيشديم
اونو منه دان دئدين
من ائليم‌دن دانيشديم
من جواب قان دئدين
آرخاندا من دايانديم
اؤزگه‌لره جان دئدين
سوردوم چارا درديمه
درمان اوچون يان دئدين
حاق سؤز دئمك ايسته‌ديم
خوروز كيمي بان دئدين
سئوديم آخير يوردومو
نيه منه پان دئدين؟
پروفسور حميد نطقي
كيمليگيم...
هله ده آديمي چكه‌بيلميرم
هله‌ده كيمليگيم
قيرخ قات بو‌خچادا
اووسونلارلا دويونلو
گيزلين ساخلانير
هله ده قارداشيم بركه‌دوشنده
اؤزوندن اوتانير
اصليني دانير!!
عاشيق اولدوز
توت اليمدن آپارمني تبريزه ....
قسمت اولوب بو گون قوناق گلميشم ,
توت اليمدن آپار مني تبريزه
بو گوروش, بو ميثال گلمه‌سين بيزه
توت اليمدن آپار مني تبريزه
آيلا چيخيم گون‌له شفق ساچيم
دورنا كيمين ائلدن- ائله اوچوم
ده ده شهرياردان صحبت آچيم من
توت اليمدن آپار مني تبريزه
لپه‌له نيم آرازي ايله آخيم من
قارتال اولوم ساوالاندان باخيم من
هيجران قالاسيني سوكوم ييخيم من
توت اليمدن آپار مني تبريزه
عيني ديلده اؤتن ديللريميز وار
آراز لا بير له‌شن سئللريميز وار
تبريز له باكي تك ائللريميز وار
توت اليمدن آپار مني تبريزه
" اولدوز" ديله‌ر هئچ‌كس ائلدن كؤچمه‌سين
بيرجه قوش‌دا يووواسيندان اوچما‌سين
اوغلوم, قيزيم يادلارا ال آچماسين
توت اليمدن آپار مني تبريزه
سهراب طاهیر
گئدیرم...
بير آخشام سن منى قوناق ساخلادين
يارامى يارانلا يويوب باغلادين
منيم گؤزلريمله بعضن آغلادين
قويمادين گؤزلريم دولا قارداشيم
تويونا گلميشم٬ هر يئر خونچادير
بوش اليم بوكولموش٬ قانلى غونچادير
بيرجه اوره ييم وار٬ پارچا پارچادير
او سنه چاتاجاق٬ آلا! قارداشيم.
اوره ييم شيشه دير٬ اوره ييم حليم
كيم اونو ايكی يه بؤلدو٬ نه بيليم
آل٬ او چيليك چيليك٬ او ديليم ديليم
اونو بير بيرينه جالا٬ قارداشيم!
دره لر كئچه ره م٬ داغلار كئچه ره م
اؤزومه آلوودان پالتار بيچه ره م
ظولمتى اريديب سئل سئل ايچه ره م
قويمارام ائل داردا قالا٬ قارداشيم
من سؤهراب طاهيرم٬ نه لازيم اؤيود؟
بيرجه اوغلوم قاليب٬ اونو سن بؤيود!
گئديره م جبهه يه٬ سيلاحيم اوميد
قالماييم قارداشدان دالا٬ قارداشيم
پروفسور صبري تبريزي
منليگيم...
گون منيم
دريا منيم
تامام دونيالار منيم.
آمما گونومو آلديلار
آيي مندن آيري سالديلار
درياني‌دا
دونياني دا قوپارديلار
چون آناديليمي آلديلار
آمما گونو, آيي, دريالاري
تامام دونيالاري
روحومدا ياراتديم
محبسه سالينميش ديليمي
آزاد اولماق اوچون ياشاتديم.
بررسی معاملات معارض+